النت بيفصل عندك كل دقيقة ويرجع؟ إليك الاسباب المحتملة

السلام عليكم

هل عندك مشكلة مضايقاك وهى انك كل شوية يفصل النت عندك بصفة مستمرة؟ يفصل الماسنجر لمدة ثانية ويرجع يعمل reconnect تاني من جديد؟ مع ان ايقونة النت ورك سليمة و الكونكشن بتاعك Connected ومعملش unplugged ولا اى حاجة ؟

المشكلة دي ليها اسباب كتير هناخدهم واحده واحده تتأكد منهم وان شاء الله هتتحل

1. إتأكد ان كل التليفونات الارضية اللى فى بيتك متركب فيها فلتر لأنك لو مش مركب فلتر لكل عدة تليفون ممكن يأثر على خط النت بتاعك.
2. كذا واحد قالى ومنهم واحد من خدمة العملاء قالى انه يفضل انك تركب السبلتر بتاعك فى اول طرف سلك التليفون اللى داخل بيتك يعنى مش تاخد حرارة التليفون من الفيش اللى بتبقى متركبة فى الحيطة لأنها ساعات بتعمل مشاكل , لا خد من السلك اللى طالع من بوكس التليفون عليك على طول مباشرةً.
3. إتأكد من سلامة سلك التليفون بتاعك لأنه سلك ضعيف و بيتأثر بعوامل كتير مثل المطر وغيره.
4. إتأكد من سلامة الاسبلتر بتاعك وانه نوع نضيف لأنها حصلت معايا قبل كده وكان السبب من الاسبلتر ودى ممكن تفوت على ناس كتير.
5. إتأكد من الاعدادات configuration الخاصة بالراوتر بتاعك لانها لو متظبطه صح او حد لعب فيها ممكن تبطألك او تفصلك النت كل شوية. وعن تجربة
6. يفضل انك تكون الوحيد اللى معاه باسورد الراوتر لتجنب المشاكل.
7. إفصل الراوتر بتاعك و ريحه لفترة ويفضل انك تعمل كده بصفة دورية مش شرط يكون فيه مشكلة فى الراوتر علشان تريحه من الشغل.
8. تأكد من خلو أجهزة المشتركين من فيروسات الشبكة مثل الفيرس الصيني بالذات لو مركب سيرفر الميكروتك النسخة المكركة .
9. لوعندك راوتر تاني يفضل انك تجربه ممكن يكون العيب من الراوتر القديم عمره الافتراض انتهي او بقى يعمل مشاكل كتير بالذات لو الراوتر بتاعك نوعه ضعيف وطبعا كلنا بنفضل استخدام الRouters المشهورة زي الثري كوم 3com
10. كده انا نسيت خطوة ولا حاجة ؟ لو نسيت حاجة قولوهالي.
    اتبع الخطوات دي واحدة واحدة و ان شاء الله المشكلة هتتحل وتذكر ان دايماً اى مشكلة مش بتتحل إلا بالتجربة العملية وبالخطوات .
    واخر خطوة ممكن تلجأ ليها هى انك تتصل بخدمة العملاء بتاعة شركة الانترنت بروفايدر وتقولهم المشكلة لكن قبلها افصل كل الناس عن الشبكة و وصل جهازك بالراوتر مباشرةً لأن دي اول حاجة الراجل بتاع الدعم الفني هيطلبها منك.
    يلا سلام عليكم